Скопје, 28 јуни 2010 (МИА) - Современиот балет „Изгубена верба“, во кореографија на Саша Ефтимова, а по музика на Љубомир Ангелов-Љупа в среда премиерно ќе биде изведена во Големата сала на МОБ. Претставата е копродукциски проект помеѓу МОБ и Дирекцијата за култура и уметност на Град Скопје. Никола Глигоров, директор на Дирекцијата за култура и уметност на Град Скопје на денешната прес-конференција рече дека балетот „Изгубена верба“ e вклучен во годинашната програма на манифестацијата Скопско лето. Авторот на кореографијата Саша Ефтимова информира дека претставата „Изгубена верба“ е сосема поинаква од она што до сега го има работено. - Оваа е прва и единствена претстава која ќе биде современа класика на 21. век. Ова е нешто ново и првпат ќе го видите на сцената на МОБ, рече Ефтимова и додаде оти со оваа претстава таа се труди да го подигне нивото на националната куќа. Таа истакна дека нејзината замисла за претставата треба да оди во три дела, „Изгубена верба“ е првиот дел, вториот дел, кој треба да се постави наредната година е „Покајување“ и третиот е „Музички ангели. Нов почеток“. Ефтимова објасни дека сите овие три дела треба да се дадат во еден вид целовечерна претстава и постои идеја да се дадат со оркестарот на МОБ. „Изгубена верба“, како што рече, е љубовна приказна која ја разработува психолошката и емоционална состојба на двајца луѓе кои се во врска, прикажано преку движења, светло, „движење во движење“ и 3D визуелизација. Во претставата покрај Саша Ефтимова, учествуваат солистите на Балетот на МОБ, Бобан Ковачевски, Мими Поп Алексова, Дмитро Чеботар, Билјана Басмаџиева, Игор Веланоски, Марија Глигорова, Дафина Данилоска, Трајче Стојковски и гостинот Хозе Карлос Лосада Моралес од Куба. мд/скс/15:40