Весна Гиновска - Илкова, сопран. Афинитетите кон музиката почнува да ги покажува на 8 годишна возраст посетувајќи часови по виолончело во Нижото музичко училиште „Илија Николовски - Луј" во Скопје. На возраст од 14год. го започнува школувањето по соло пеење кај Проф.Милка Ефтимова, која е и нејзин професор во текот на студирањето на Факултетот за музичка уметност, на кој дипломира во 1994год.Во текот на 1993год. ги започнува своите интернационални настапи, од кои прв е настапот на отворената сцена на театарот „Ди Марчело" во Рим - Италија. Во 1995год. ја започнува својата специјализација кај Проф.Благовеста Карноблатова во Бугарија, а истата година во Македонија работи и со француската солистка Гимет Лоранс со која подоцна и настапува.Дебитира на сцената на Македонскиот Народен Театар во Скопје во улогата на Микаела во Бизеовата „Кармен" превземајќи го целокупниот репертоар во кој се вклучуваат улогите: Леонора (Трубадур), Тоска (Тоска), Дона Елеонора (Моќта на судбината), Мими (Боеми), Елизабета Валуа (Дон Карло), Сантуца (Кавалерија Рустикана), Аида (Аида), Лиу (Турандот), Марија (Приказна од западната страна), Ирена (Цар Самуил). Интернационалната презентација ја започнува во 1998год. со настапот во Софија како Елизабета Валуа (Дон Карло), а и во Тоска, Трубадур, Моќта на судбината, Отело; во Србија и Црна Гора со: Трубадур, Тоска, Мадам Батерфлај; во Словенија со Отело и Трубадур. Како Аида настапува во Хрватска, Турција, Данска. Како Девојката од Запад во Визбаден - Германија и како Тоска во Италија. Во 1996год станува добитник на признание на „Ханс Габор Белведере" фестивалот за млади пеачи; 1998год е полуфиналист на фестивалот „Борис Христов"; 2000год ја исполнува улогата на Елизабета Валуа (Дон Карло) како финалист на фестивалот „Борис Христов"; 2002 е добитник на наградата „13 Ноември". Настапува со Радмила Бакочевиќ, Калуди Калудов, Борис Трајанов, Румен Дојков, Јанез Лотриќ, Бојко Цветанов, Бела Перенз, Стојан Попов, Помпеј Хрштенау, Луција Папа и др. а под диригентските палки на маестрата Најден Тодоров, Тошио Јанагисава, Ено Кочо, Лоренз Волтолини, Павле Дешпаљ, Зоран Јураниќ, Милена Ињац, Јон Јанку, Ангел Шурев, Фимчо Муратовски, Александар Лековски, Томислав Шопов, Саша и Вања Николовски, Оливер Балабурски и др.

Славица Петровска-Галиќ, колоратурен сопран магистер по соло пеење оперски и концертен солист. Дипломирала на Музичката академија во Скопје кај професорот Коста Трпков.Уште како студент настапува на концертите во рамките на концертната активност на факултетот.Учесничка е на конкурсот Чајковски во Москва во 1982 година.Посебно внимание на публиката и стручната критика и стручната критика ,Славица Петровска-Галиќ свртува на себе со својот прв самостоен солистички концерт во салонот 19.19 во 1984 година. Во 1986 година заминува на едногодишна специјализација на Ленинградскиот конзерваториум . За време на тој студиски престој , како исклучително талентирана и способна певица , таа добива две улоги во театарот „Рубинштајн": улогата на Виолета во операта ,,Травијата и Розина во „Севилскиот бербер" кои што со успех ги реализира. Освен тоа во Ленинград одржува и солистички концерти.Својот прв настап на сцената на Операта на МНТ го има со улогата на Барберина во Моцартовата опера „Свадбата на Фигаро", за која критичарот на весникот „Нова Македонија" ќе напише: С.П.Галиќ блесна со својата мала но бисерно отпеана арија и со својот усет за сцена и ситуација". Потоа следува улогата на Амор во операта „Орфеј" од К.В.Глук изведена на фестивалот „Охридско лето".По кусиот едногодишен ангажман во Мариборската опера каде кон својот репертоар ги додава и улогите на Блонда и Констанца  во Моцартовата опера „Грабнување од сарајот" се враќа во Скопје и во 1987 година добива постојан ангажман во Операта на МНТ.Од тој момент почнува нагорниот пат на С.П.Галиќ, пат на кој од улога до улога се нижат успеси за да се стигне до почетното звање-првенка на Операта на МНТ. Покрај веќе споменатите улоги на Розина во „Севилскиот бербер",  Блонда, Констанца од „Грабнување од Сарајот", сега С.П.Галиќ во својот репертоар ги додава и улогите Адина во „Љубовна напивка", Хана Главари во „Веселата вдовица", Оскар во „Бал под маски", Неда во „Палјачи", Мизета во „Боеми", Џилда во „Риголето" и Лучија во „Лучија ди Ламермур".Од овој респектабилен број на остварени улоги треба посебно да се издвојат улогите на Виолета, Џилда, Лучија и Розина, кои претставуваат креативен врв во нејзините интерпретативни дострели. Од овие врвно остварени улоги сепак треба да се истакне улогата на Виолета Валери од операта „Травијата" за која критичарот на Македонија денес од 07.06. под наслов „Креативна возвишеност", а по повод настапот на XXX-тите ,,Мајски оперски вечери,, во 2002 година ќе напише:
,, Славица Петровска Галиќ со топлината на гласовниот тембр, со сензуалното фразирање и прекрасната сопранска колоратура , во голем стилски дијапазон и оригиналната артикулација , сликовито и емотивно продлабочено ја долови трогателната сентименталистика во толкувањето на трагичниот лик на Виолета". Во еден друг напис среќаваме: „С.П.Галиќ беше доминантен извор на креативниот израз-sвезда на вечерта.Таа, улогата на Виолета Валери во „Травијата" ја оствари во незаборавна емотивна изведба, комплетно предадена со особен сензибилитет за трансформација , заборавајќи го сопственото вистинско јас".
С.П.Галиќ гостувала на сите поголеми музички центри на поранешна Југославија, потоа во Бугарија, Грција, Данска, Русија, Италија, Франција, Германија, на фестивалите Скопско, Битолско, Охридско лето, на други музички и културни манифестации, како и во: Вилниус, Каунас, Софија, Пловдив, Благоевград, Сант Петерсбург, Копенхаген, Солун, Рим, Нижни Новгород, Осјек, Риека, Белград, Нови Сад , Загреб, Марибор, Блед и др. Гостувањето на фестивалот „Болдинска есен" во Нижни Новгород (Русија) критиката и публиката го парафразира со слоганот „Славица се прослави -таа со својата инетерпретација ја трогна публиката во салата".Покрај настапите на оперската сцена, С.П.Галиќ го негува и концертното пеење, настапувајќи на солистички концерти, посебно со камерното трио „Скопје". За еден од овие солистички концерти критичарот на „Вечер" под наслов „Враќање кон вредностите" ќе напише: „Таа поседува еден полн со носивост глас, вонредни вокални нијанси, чудесни пијанисима како и однегувано чувство за концертно-вокално исполнувачко рамниште".Во продолжение нека бидат наведени само уште неколку карактеристични наслови во печатот, а по повод нејзините настапи на оперската сцена и концертниот подиум: „Вонредно пеачко-артистички блесок" („Вечер" од 19.01.1994 година за толкувањето на улогата на Виолета во операта „Травијата"), „Раскошни потенцијали" (по повод солистичкиот концерт на фестивалот Охридско лето во 1994 година), „Оркестарот полнокрвно ангажиран -солистот вонсериски" (за настап на концертот за глас и оркестар од Р.Глиер со Македонската филхармонија).Сепак, круна на нејзината уметничка кариера претставува концертот одржан на 6 март 2002 година под наслов „Славица Петровска -Галиќ со пријателите", на кој заедно со познатите солисти-нејзини колеги од нашата Опера и од другите оперски куќи од странство: Радмила Бакочевиќ, Јадранка Јовановиќ, Милка Ефтимова, Никола Митиќ, Цветан Стојановски и други, го прослави 20-годишниот јубилеј на својата уметничка дејност. Овој исклучителен настан во нашата културна и музичка јавност беше мошне позитивно оценет. За тоа сведочи топлиот прием и овациите на публиката, како и написите во печатот: „Оперски хепенинг", „Вечер на вистинските вредности", „Техничка перфекција со длабоки емоции" - тоа се некои од насловите во медиумите по повод овој концерт. Тоа беше ревија на истакнати солисти во кои доминираше славеничката на вечерта Славица Петровска-Галиќ .Според искажувањата на критиката таа ги надмина стандарните дострели и со зрелоста на својот вонсериски талент и се придружи  на европската оперска солистичка елита.Од сето погоре изложено се гледа дека во ликот на Славица Петровска-Галиќ нашата музичка, а посебно оперската уметност, има вонредно способен, зрел и креативен уметник. Славица Петровска-Галиќ исто така е добитник на нашето највисоко признание - наградата „11 Октомври" во 2002 година. Истата година станува Уметнички раководител на Операта до 2005 година. За тоа време на нашата оперска сцена ги има поставено: „Кармен", „Набуко", „Иван Сусанин", „Посета на старата дама", „Таен брак", „Мадам Батерфлај", „Тоска", „Лилјакот" и „Лидија од Македонија".

Сандра Митровска, сопран. Родена е во Скопје во 1980 година. Музичка наобразба завршила во Скопје. Средно образование и Музичка академија завршила во класата на проф. Билјана Јакимовска. Го посетува оперското студио на проф.Стојан Стојанов Ганчев во Загреб. Својот почеток го имаШе во улогата на Кејт „Мадам Батерфлај". Потоа следат улогите: Втората дама во „Волшебната флејта", Г-ѓа Грос во „Свртување на Шрафот", Леонора во „Трубадур" и Сантуца во „Кавалерија Рустикана".

Павлина Новакова Георгиев, сопран. Родена 18.03.1975  во Битола.Едукација-1997 дипломира со CUM LAUDE на ФМУ-Скопје во класата на проф.М.Ефтимова. Од 1999год. е во постојан работен однос во МНТ Скопје. Добитник е на неколку државни награди меѓу кои и Прва специјална државна награда. Специјализација во Загреб во мајсторската школа кај проф.С.Стојанов -Ганчев. Исто така се надградува кај оперската легенда г-ѓа Гена Димитрова. Концерти и настапи во опери-Македонија, Југославија, Словенија, Германија, исто така настапува и со Македонската Филхармонија.
Дел од критиките на гостувањата:...Павлина Новакова Георгиев - гласот со морска бескрајност ....сребрен глас со снага која го подига од седиште слушателот...

Репертоар:

Турандот- (Турандот)
Абигаила- (Набуко) (Југославија,Словенија)
Леонора- (Трубадур)
Мими- (Боеми)
Неда- (Палјачи)
Микаела- (Кармен)

Дешира Ахмети, сопран. Родена е во Дебар, каде го завршува своето средно образование.Дипломирала на Академијата за Убави уметности во Тирана,Р.Албанија, оддел соло пеење, во класата на познатиот руски педагог, Проф.Нина Мула . Иако млад уметник, веќе има настапувано на повеќе концерти во Минхен, Тирана, Приштина, Скопје и др. Настапувала и во програмите на телевизиите во Тирана и Приштина, како и на Македонската Радио Телевизија .По концертот „Враќање" одржан во Приштина во 2000 година  познатата артистка Ванеса Редгрејв за ББС - Телевизија изјавува : „Ангелскиот глас на Дешира Ахмети ветува многу". Дешира Ахмети дебитирала на сцената на Операта на МОБ, во 2005 година во улогата на Микаела од операта „Кармен" од Жорж Бизе, настапувала и  како солист на неколку Гала оперски концерти на сцената на Операта на МОБ.

Родена 1982 година во Скопје, уште во средното музичко училиште “Илија Николовски-Луј“ настапува како солист со училишниот оркестар со изведба на мотетот “Stabat Mater“ од Џ.Перголези, следниот позначаен настап и е со Балканаската Филхармонија со дело од Властимир Николовски.
Дипломира во 2004 година во класата на проф.Билјана Јакимовска-Јовановска на Факултетот за Музичка Уметност во Скопје.
Се здобива со титулата магистар на Музичката Академија “Панчо Владигеров“ во Софија, Р. Бугарија во класата на проф.Мила Дјулгерова. Меѓу позначајните солистички настапи и се: концертот “250 години Волвган Амадеус Моцарт“ со  Државниот симфониски оркетар под диригентство на маестро Алексанадар Јосифов - Софија, концертите во чест на  проф.Мила Дјулгерова и проф.Мати Пинкас во Софија, Р. Бугарија. За време на постдипломските студии дебитира на сцената на Македонската Опера и Балет во улогата на Рита од истоимената опера на Г.Доницети, учествува на Гала концерти организирани од срана на МОБ, настапува во современата опера “Свртувањето на шрафот“ од Б.Британ во улога на Маилс, “Волшебната флеита“ од В.А.Моцарт во улога на првото  момче, учество во Мултимедиалниот проект “Дороти. Дисконцерт за Оз“ на Луиџи де Анџелис како една од трите сопрани со кој проект настапува во Скопје и Германија.
Учествува на хуманитарни концерти низ Македонија - 2007 год. Учествува во проекти наменети за едукација на деца во областа на музиката-проекти на режисерката Уши Хорнер – 2008 год. Има посетувано семинари од еминентни оперски професори како што се: проф.Оливера Мијакович, Ана Синтова-Томова, проф.Велизара Карајанкова и диригентот Даниеле Џулио Молес.
Во нејзиниот репертоар (подготвен со диригент) се:  Серпина “Слугинка господарка“- Џ.Перголези; Церлина “Дон Џовани“, Прво и Второ момче “Волшебната флеита“- В.А.Моцарт; Адина “Љубовен напиток“- Г.Доницети; Розина “Севилскиот Берберин“, Џулија “Свилените скали“- Џ.Росини;  Џилда “Риголето“, Оскар “Бал под маски“- Џ.Верди; Мизета “Боеми“- Џ.Пучини.