Марија Јосифовска, родена на 27.09.1979 година во Скопје, своето балетско едуцирање го започна на својата седумгодишна возраст во Пионерскиот дом "Карпош" - Скопје, од  каде продолжува во нижото балетско училиште "Илија Николовски Луј" во класта на проф. Елисавета Кушовска. Средно образование го завршува со одличен успех и големо искуство на балетската сцена, како резултат на учеството на неколкуте натпревари и семинари на кои учествувала (Варна - Бугарија, Лозана - Швајцарија, Казанлк - Бугарија, Кастр - Франција, Конгрес на млади таленти во Реџо ди Калабрија - Италија итн.) и завршните годишни концерти, во кои секогаш настапувала со солистички улоги (како што се Симфонија на цвеќето, Заспаната убавица, Дон Кихот и др.). Веднаш во 1999 г. се вработува во ансамблот при Македонскиот народен театар а потоа во 2001 г. како истакнат солиста во кој веднаш добива можност да се докаже и во текот на последните четири години игра во следните претстави: Лебедово езеро, Оревокршачка, Дон Кихот, Шопенијана, Македонска повест, Корсар, Жизел, Па де катр, Варијација Бизе, Валпургиска ноќ, Штраусијада, Танц на кадетите, Пинк Флојд, Леди магбет, Песни за љубовта и смртта, како и приватни проекти на Јагода Сланева (Јунакот и судбината, Тутуноберачите) и на Рисима Рисимкин (Свадба, Дабова Шума). Исто така, ги остварува и главните улоги во следните претстави: Валпургиска ноќ, Дон Жуан, Корсар, Снежана и 7-те џуџиња, Оревокршачка, Дон Кихот, Силјан повторно лета и Порги и Бес. Како истакнат солиста при МНТ, гостува при турнеата во Тајван, на светскиот саем "Експо" во Португалија и редовните претстави низ Македонија.